Сред летна жега и пеколни горештини, туристички Охрид во продолжените празнични денови се соочува со пожари кои го зафатија охридскиот регион. Од утрово два хеликоптери се вклучија во гаснење на пожарот што четврти ден ги голта шумите над селата Опеница, Косел, Вапила, Куратица и Расино.
“Од раните утрински часови се уклучени два хеликоптери кои што гаснат од воздух на тешко пристапни места,пробуваме да ги локализираме тие критични точки, да ги ставиме под контрола,нема опасност помеѓу околните села”- вели Борко Јанкулоски-командир на ТППЕ Охрид
И додека едни се разладуваат во водите на Охридското езеро, езерската полиција овозможува хеликоптерите да црпат вода која ја испуштаат на критичните места
Иако селата каде што изби пожарот се одалечени од градот 15-тина километри,чадот ноќеска силно се чувствуваше во Охрид, мерната станица на министерството за животна средина покажа двојно поголема концентрација во воздухот на штетните ПМ 10 честички. Но се чини тоа не им пречи на гостите кои го наполнија туристичкиот центар.
“Немате претстава каква е разликата меѓу Кавадарци и тука, тоа е нешто невидено,да се изнаспиеш. Ако не се покриеш, не можеш да спиеш, толку е пријатен и е многу убав“
„Четири дена сме овде и многу е убаво,искрено не сум, видел почиста вода од овде.И покрај пожарите,лесно се дише, Охрид е воздушна бања, така што ќе биде се во ред“
„Јас сум од Германија дојдов пред 2 дена,пријатно е овде. Има доста музички настани,бројни коцерти така што ќе одам на еден и мислам дека ќе останам повеќе денови од планираното”
Во топлите празнични ноќи, Охрид до раните утрински часови,пулсира во ритамот на бројните културни манифестации и концерти на неколку светски и домашни музички ѕвезди. Музичките настани привлекоа дополнителен број туристи на охридската ривиера, некои од нив дојдоа исклучиво само за бројните културни манифестации. Во моментов во Охрид престојуваат околу 100.000 туристи. Тоа е огромна бројка што создава фреквенција од невидени размери, концертите ја наметнаа неопходноста од превземање дополнителни мерки за безбедност.
Новинар Росица Голабоска
