Стимул за меѓудржавна соработка помеѓу земјите од Западен Балкан и финансиска помош за развивање на енергетиката, транспортот како и дигитална транзиција ќе биде дводневниот лидерски состанок во Скопје. Според познавачите, Унијата на иста маса ќе ги седне челниците од шест држави за да ги мотивира и преку финансиска поддршка за доближување на европските стандарди во однос на инфраструктура, обновливите извори на енергија но и дигитализацијата. Александар Ристевски за Алфа коментира дека надеж за брзи реформи дава и тоа што македонската Влада веќе покажала одредени резултати во однос на тие сектори.
- „Прилично надеж барем околу македонската влада ми дава работењето на министерот за транспорт Александар Николоски, а она што го прави министерот Стефан Андоновски во Дигитална трансформација. Гледаме дека интензивно се работи и со приватниот сектор и со научните институции за одредени процеси се забрзаат и Македонија да биде многу понапред со исполнувањето на оние квалитативни и инфраструкрни услови пред пристапувањето отколку цело време строго да се занимаваме со политичките прашања кои очигледно секогаш ни се камен за сопнување“ коментира АЛЕКСАНДАР РИСТЕВСКИ – политички аналитичар.
Ристевски вели дека Македонија има потенцијал многу да напредува и во овој дел, а соработката со бизнисот изминатиот период покажува дека и трговците се заинтересирани за обновливи извори на енергија, тема што и Европската комисија го потенцира за состанокот во Скопје.
- „Она искористување на обновливи извори на енергија Македонија почна да го искористува уште пред 10-тина години, а се вклучи и приватниот сектор. Тоа се фотоволтаиците, гледаме дека државата вложува, гледаме странски инвеститори кои сакаат да вложат во ветерен парк. Следен чекор е тие проекти кои што Македонија ги влече 20-30 години а тоа е инвестирање во базична енергија да ги спроведе“ вели АЛЕКСАНДАР РИСТЕВСКИ – политички аналитичар.
Скопје ќе биде домаќин на лидерската средба ЕУ – Западен Балкан посветен на Планот за раст. Според агендата, на иста маса ќе седнат премиерот Христијан Мицкоски и неговите колеги од регионот а ќе присуствува и еврокомесарката за проширување Марта Кос.
Лидерскиот состанок ќе стартува со два панела од кои првиот ќе биде посветен на Планот за раст, а вториот на конкретните механизми и поддршка за спроведување на Планот за раст и на него ќе учествуваат министри, претставници од Европската унија, регионални организации и меѓународни партнери.
Од Европската комисија велат дека, оваа лидерска ќе биде можност да се разговара за соработка меѓу земјите во области како што се заштитата на потрошувачите, туризмот и единствениот регионален пазар, со цел на унапредување на економската интеграција на Западниот Балкан во единствениот пазар на ЕУ.
Комисијата ќе предложи инвестиции од 87,7 милиони евра во рамките на Инвестициската рамка за Западен Балкан. Се очекува ова да привлече речиси половина милијарда евра приватни инвестиции во регионални проекти за чиста енергија. Шест милијарди евра е вкупната сума која Брисел ја планира за регионот.
