Се очекува денеска да биде идентификувана жената чие тело беше пронајдено во кочанското село Зрновци. Од судска медицина за Алфа потврдуваат дека првичните резултати за идентитетот обвинителството ќе ги добие денеска, а целосниот обдукциска наод во следните денови.
Истрагата на обвителството пак треба да утврди како настанала смртта, дали на телото влијаел човек или животни со оглед на тоа дека е пронајдено во фаза на распаѓање, обезглавено и без други делови.
Полицијата, пожарникарите и обвинителството до доцна синоќа го пребаруваа поширокиот терен околу местото викано Ѓошевски Орев. Од МВР соопштија дека пријавата за телото пристигнала околу 10:40 часот во СВР Штип, по што веднаш биле преземени мерки за увид и расчистување на случајот.
- „На 21.03.2026 во СВР Штип е пријавено дека околу 10:40 часот во с.Зрновци во место викано Ѓошевски орев во близина на зрновска река е пронајден човечки леш, во фаза на распаѓање. По насоки на јавен обвинител телото е дадено на обдукција. Се преземаат мерки за расчистување на случајот“ велат од МВР.
Жителите на Зрновци се потресени и посочуваат дека никој од нив не бил пријавен како исчезнат, ниту се барал од властите.
Обдукцијата и истрагата ќе треба да ги разјаснат мотивите и сторителот на овој трагичен настан.
