Ние треба сериозно да работиме на она што е базичен пробленм во однос на загадувањето, а тоа е загревањето на домаќинствата. И тука веќе имавме неколку средби со претседателот на Владата во однос на гасните централи што планираме да ги правиме во главниот град, изјави вечерва градоначалникот на Град Скопје, Орце Ѓорѓиевски, на гостувањето на една од националните телевизии.
Тој се осврна на досега сработеното и на плановите за во иднина. Ѓорѓиевски зборуваше за системот „Безбеден град“, загадувањето, вработените во јавните претпријатија.
– Не сум убеден дека многу често гледаат полни контејнери. Јас нема да бидам најискрен, ако кажам дека не се случуваат и пропусти, тоа е жива материја и знаат да се случат и пропусти. Но, дека делуваме многу подобро за разлика од појдовната точка и основа што ја имав првиот ден кога влегов во Градот Скопје со 16 функционални машини – наспроти околу 50 што се функционални сега, денес – има разлика сериозна, рече Ѓорѓиевски.
Додаде дека во план е инвестиција во нови комунални машини.
– Тоа што го направивме изминатиот период е заедно во координација со претседателот на Владата, министерот за транспорт и врски, веќе започнавме постапка преку Светска банка за да обезбедиме повеќе од 20 комунални нови машини што ќе бидат за потребите на „Комунална хигиена“. Тоа подразбира нова механизација, дел од старата механизација за која се одлеваат сериозни средства за амортизација и поправка да ја тргнеме настрана и настапиме со нови камиони. Во Буџетот за наредната година ќе бидат предвидени одредени средства дополнително како Град Скопје и „Комунална хигиена“, да инвестираме во нови машини, и механизација, ќе го направиме тоа, посочи градоначалникот.
Зборувајќи за вработените во јавните претпријатија, Ѓорѓиевски рече дека смета оти во „ЈСП – Скопје“ има многу договорци, чиј статус треба да се реши.
– Многу договорци има во „ЈСП – Скопје“. Но, тоа се шофери кои дефакто мора да останат да си ја вршат работата. Потребни се и дефицитарна е таа работа и ќе дадам се од себе да барем дел од нив, наредната година се потрудам заедно со новоназначениот директор да го решиме статусот на тие луѓе. Затоа што таму има луѓе коишто по 12,13 години се договорци на дело и треба да им се реши трајно вработувањето, смета Ѓорѓиевски.
Тој најави иревизија на работењето во Град Скопје, посочувајќи дека веќе им се одземени надлежностите на 23 раководители на сектори во институцијата со која раководи.
