Основниот кривичен суд Скопје денеска потврди дека судија на претходна постапка го прифатил предлогот на скопското Основно јавно обвинителство на петтемина осомничени за злоупотреби во Агенцијата за стокови резерви да им бидат определени мерки на претпазливост.
На осомничените им се одземени пасошите и им е определено редовно да се јавуваат во судот додека трае истрагата.
Со истрагата се опфатени поранешниот заменик-министер за земјоделство Трајан Димковски, екс директорите на јавното претпријатие „Агроберза“ и на Агенцијата за стокови резерви, вешто лице и раководител во Агенцијата за стокови резерви.
Како што соопштија вчера од Јавното обвинителство, тие се товарат за кривичното дело злоупотреба на службената положба и овластување од член 353 став 5 во врска со став 4 и став 1 од Кривичниот законик.
Според обвинителството, додека осомничените биле на функциите, бил направен отпис на поголемо количество меркантилна пченица и јачмен, со што државниот буџет бил оштетен за околу 780.000 евра.
