Македонската економија ќе порасне за 3,2% годинава и ќе забрза на 3,3% во следните две години – стои во најновиот извештај за есенската прогноза за земјава на Европската комисија. Главен двигател на растот ќе бидат бруто-инвестициите, засилени од јавните вложувања, особено работата на патните коридори 8 и 10д. Инвестициите на компаниите ќе бидат поттикнати од подобрувањето на бизнис амбиентот и субвенционираното финансирање преку заеми од Унгарија и кредитни линии на ЕИБ, се наведува во Прогнозата. Подобри перформанси досега имале извозот и увозот, споредено со пролетната прогноза. Според ЕК, иако трговските врски на Македонија со САД се ограничени, државава сепак е индиректно изложена на влијанието на американските царини преку извозот на автомобилски компоненти во Германија.
„Растот на потрошувачката на домаќинствата се зголеми по слабите перформанси во 2024 година, поддржан од зголемувањето на реалните расположливи приходи поттикнати од силниот раст на пензиите и платите, експанзијата на кредитите за домаќинствата и намалувањето на инфлацијата“ – се вели во Прогнозата.
Европската комисија нотира дека инфлацијата се зголемувала од септември минатата година поради поскапувањето на храната, но и дека се очекува таа да го достигне посакуваното ниво од 2% до 2027-ма година. Предвидена е и фискална консолидација, па очекувањата на Комисијата се дека дефицитот ќе се намали на нивото од 3,2% во 2027-мата.
„И покрај силните перформанси на јавните приходи во првите девет месеци од 2025 година, достигнувањето на целта за дефицит од четири отсто од БДП за 2025 година претставува предизвик, бидејќи тековните трошоци беа повисоки од првично планираните. Се предвидува дека дефицитот постепено ќе се намалува, но ќе остане над три проценти од БДП“ – се вели во документот.
Ризиците врз економијата остануваат умерени. Домашните доаѓаат од намалувањето на потрошувачката на домаќинствата како резултат на инфлацијата или евентуални проблеми при реализација на инфраструктурните проекти. Комисијата бара брзо завршување на структурните реформи, согласно договореното во рамките на Планот за раст со ЕУ, што треба да ги подобри перспективите за продуктивност и раст на економијата.
