Кривичниот суд го одложи рочиштето за милионските злоупотреби во ЕСМ со набавката на адитиви за државните електрани. Од судот информираат дека главната расправа, претходно закажана за денеска и за 11 јули, се одложува за 16 јули во судницата во Идризово.
Неизвесно е дали ќе има промена во судечкиот совет за овој предмет, со оглед на тоа дека главниот судија Даниела Димовска од минатата недела беше назначена за в.д. претседател на Кривичниот суд.
Инаку, во предметот „Адивит“ се опфатени 33 физички и пет правни лица. Според обвинителството, тие се здружиле за да се збогатат на сметка на државата, иако таа добро ги плаќала и им дала доверба да водат еден од најважните сектори – производството на струја.
Обвинителството ќе докажува дека групата, на чело со поранешните директори на ЕСМ, Васко Ковачевски и Васко Стефанов, и раководните структури во РЕК Битола, ТЕЦ Неготино и ТЕЦ Осломеј, преку пререгистрација на фирми и договарање меѓу економски оператори, местеле тендери за набавка на адитиви за јаглен. Адитивите биле плаќани неколкукратно поскапо, а не само што не се користеле, туку биле и опасни по здравјето на луѓето.
Досега сите обвинети негираа вина, а првообвинетиот Ковачевски е во бегство.
