Честитки по повод Меѓународниот ден на трудот од државно-политичкиот врв. Претседателката Гордана Сиљановска – Давкова вели дека:
„1 Мај е ден кога работниците и синдикатите со право протестираат за повисоки плати и пошироки права, потенцирајќи го социјалниот карактер на македонската држава што има уставна обврска да води сметка за хуманизмот, социјалната правда и солидарноста како темелни вредности на уставниот поредок“ – вели Силјановска Давкова..
Претседателот на Собранието, Африм Гаши, вели дека државните институции имаат обврска да создаваат услови за сигурна, правична и достоинствена работа за сите.
„Вашиот труд заслужува да биде вреднуван соодветно, со почит и со поддршка“ – вели тој.
Премиерот Христијан Мицкоски, пак, порача дека трудот е темелот на достоинството и напредокот.
„Како Влада, остануваме целосно посветени на подобрување на животниот стандард на граѓаните. Ќе продолжиме со политики кои значат зголемување на минималната и просечната плата, унапредување на пензискиот систем, отворање нови работни места, јакнење на работничките права и намалување на невработеноста“ – наведува, меѓу другото, премиерот Мицкоски.
И политичките партии упатија честитки до работниците.
Од ВМРО-ДПМНЕ велат дека овој ден е симбол на борбата за работничките права.
„ВМРО-ДПМНЕ останува посветено на создавање нови економски политики кои ќе овозможат отворање на нови работни места, подобрување на стандардот и креирање општество во кое секој граѓанин ќе има можност за напредок и просперитет“ – се наведува, меѓу другото, во партиското соопштение.
Претседателот на СДСМ, Венко Филипче, порача дека трудот мора да се вреднува, а гласот на работникот да се слуша.
„1 Мај е ден кога го славиме трудот и достоинството на секој човек што создава, гради, образува, лекува, се жртвува за своето семејство и за нашата земја. Како човек, секогаш сум имал длабока почит кон секој што со својот труд го движи општеството напред“ – напиша Филипче на социјалните мрежи.
Честитика стигна и од коалицијата ВРЕДИ. Оттаму велат дека биле посветени на враќање на достоинството на работниците со конкретни дела.
