Македонија во изминатиот период презела повеќе мерки за развој на научно-истражувачката дејност и создавање организиран национален иновациски екосистем, а следниот приоритет е поврзување со регионалните и глобалните истражувачки мрежи, истакнала министерката за образование и наука Весна Јаневска на министерскиот состанок на Управувачката платформа за истражување и иновации за Западен Балкан во Брисел.
Како што соопшти Министерството за образование и наука, Јаневска посочила дека за краток период е двојно зголемен буџетот за наука, воспоставена е нова стратешка рамка, подготвени се нови законски решенија и модернизирана е националната истражувачка инфраструктура.
– Формиравме Национален совет за иновации, претприемништво и технолошки развој, кој е одговорен за координација на националните активности и иницијативи, а основавме и посебна Агенција за иновации, научно – технолошки развој и претприемништво, која ќе го олесни пристапот до средства и услуги за компаниите, истражувачите и иноваторите – рече Јаневска.
Таа информирала дека Македонија има седум центри за трансфер на технологии, пет технолошки инкубатори и еден приватен научно-технолошки парк, а во процес на основање се виртуелен научно – технолошки парк и првиот технолошки парк под целосна надлежност на државата. Јаневска додаде и дека проектот ВЕЗИЛКА пак е првата национална контактна точка во европската мрежа на фабрики за вештачка интелигенција.
– Тековен главен фокус е намалување на одливот на мозоци и создавање услови за задржување на младите истражувачи во земјата каде се очекува да го реализираат својот личен потенцијал – рече министерката, потенцирајќи дека земјите од Западен Балкан се соочуваат со слични предизвици во областа на науката и истражувањето и идентични можности за подеднакво да придонесат кон регионално справување со истите.
На состанокот во Брисел, на кој учествуваат министри за образование и наука од регионот, се разговарало за политики за поддршка на иновациите и за добри практики во истражувачката дејност.
Во рамки на посетата, како што информираат од МОН, треба да оствари и билатерална средба со европската комесарка за стартапи, истражување и иновации, Екатерина Захариева.
