Разочарани, изнемоштени, болни, гладни, огромна бројка на пензионери својот револт за малите пензии го истурија пред Владата. Со апарати за притисок, чадори за сонце и желба за подобро утре пензионерите од речиси цела Македонија своите барања ги претставија пред македонската јавност.
Велат сакаат линеарно покачување на пензиите од 3500 денари,а не процентуално, или минималната пензија да биде 18 000 денари, нова методологија и достоинствен живот. Посочија дека ова е прв пат во независноста на Македонија да излезат на улица, бидејќи мора да бираат дали да купат лек или леб.
Револтирани се од покачувањето на платите на функционерите, велат дека не може државата за некого да е мајка, за некого маќеа. Бараат оставки од Владата, за која како што посочуваат, треба да биде чувар на граѓаните, а не џелат за сиромасите.
Пензионерите од говорницата поставена пред Владата уште еднаш упатија и апел за нов претседател на Сојузот на здружение на пензионерите, затоа што според нив, сегашната претседателка Станка Трајкова не ги застапува нивните интереси.
Инаку министерката за труд и социјална политика Јованка Тренчевска завчера најави дека до крајот на месецот очекува конкретни предлози во однос на пензиите, со фокус на пензионерите со ниски месечни примања, а за што изминатиот период заседаваше работната група формирана по првиот протест на пензионери во Скопје.
Мери Симоновска
