Голема полициска акција во валандовското село Јосифово. Под силно обезбедување и со засилено присуство на полициските сили, припадници на МВР влегоа во фабриката за производство на медицински канабис „Грин лајф“, каде започна заплена на поголема количина марихуана.
Акцијата се одвиваше зад затворени врати, додека пред фабриката беа паркирани четири камиони подготвени за транспорт на канабисот.
„Под силно полициско обезбедување, кордонот на МВР во дворот на фабриката за канабис „Грин лајф“ влезе околу 12.30 минути, каде почна во камиони да се товарат кутии полни со марихуана“.
Засега надлежните институции официјално не откриваат детали, со образложение дека акцијата сè уште е во тек, но според неофицијални информации на Алфа, станува збор за заплена на околу 1 тон канабис.
Фабриката „Грин лајф“, според официјалните податоци, е основана на 1 јануари 2018 година и работи во Јосифово. Сопственички удел во компанијата има српската фирма „Био Натуралс“, со седиште во Белград, која во Србија се поврзува со истраги за шверц на канабис од Македонија.