Македонија веќе две децении неправедно „седи на оградата“ на Европската Унија – оценува Жолт Бунфорт , специјален претставник за Западен Балкан на унгарскиот премиер Виктор Орбан. Тој после средбата со потпретседателот на Собранието Антонијо Милошоски кажа дека доколку процесот на проширување навистина се води по мерит-систем , Македонија и земјите од регионот одамна требало да бидат полноправни членки на Унијата. Бунфорт порача дека е време пристапниот процес да се забрза.
“Она што е важно е да видиме дека земјите од регионот, вклучително и Македонија, треба да станат полноправни членки на ЕУ. Тоа е сè што можам да кажам во моментот. За нас би било многу важно да се забрза овој процес и да им се даде на земјите шанса да станат членки на ЕУ. Доколку станува збор за мерит базиран пристап, мислам дека Македонија и регионот заслужуваат полноправно членство – рече Бунфорт во одговор на новинарски прашања по средбата. Сметаме дека е пародија што Северна Македонија „седи на оградата“ повеќе од дваесет години. Сега се обидуваме да направиме сè што е во наша моќ за да го забрзаме овој процес ” изјави Жолт Бунфорт, специјален претставник за Западен Балкан на премиерот на Унгарија, Виктор Орбан.
Милошоски порача дека Унгарија безрезервно го поддржува проширувањето на Европската Унија, не само за Македонија туку и за целиот регион, кој, како што рече, предолго чека на исполнување на ветувањата дадени уште на Солунскиот самит во 2003 година.
“Билатералните односи се на одлично ниво, во политичка смисла на зборот, но исто така она што охрабрува е што во однос на можните инвестиции и заеднички проекти и зголемување на трговската соработка исто така постојат конкретни проекти, кои се веќе во тек на реализација, и мислам дека тоа ќе ја засили и трговската и стопанската врска помеѓу Македонија и Унгарија” – рече Милошоски.
Потпретседателот на Собранието,најави дека двете земји ќе продолжат со интензивна билатерална комуникација. Истовремено,откри дека Унгарија покажува интерес за влез на телекомуникацискиот пазар во земјава, додека паралелно се разгледуваат и заеднички проекти во енергетиката.
