Неколку активности неделава се реализирани во Основното општинско училиште „Никола Карев“ од Кочани и во подрачното училиште во село Тркање.
Обновени се и реконструирани делови од покривот на спортската сала „Кочанските ангели 16 март 2025“, каде се изведува наставата по физичко образование. Салата е подигната пред 13 години, зафатот е направен во насока на нејзино одржување и обезбедување подобри и побезбедни услови за работа на учениците и наставниците и за сите што ја користат.
-Истовремено, во подрачното училиште во село Тркање поставени се нови бели табли во сите училници, со што значително се подобрени условите за одвивање на воспитно-образовниот процес- изјави директорот на ООУ „Никола Карев“, Александар Андов.
Нашата цел, нагласи, е јасна, секое дете, без разлика каде учи, да има еднакви и квалитетни услови за образование.
Паралелно со ова, во училиштето се одвива проектот „Заедно за Кочани“ во партнерски однос со невладината организација „Odonata Association“.
Училиштето ги отстапува ѕидни површини, а ликовните уметници на „Odonata Association“ на нив создаваат мурали, како траен спомен за починатите во трагичниот пожар во „Пулс“.
Според директорот Андов, овие уметнички дела не се само визуелен израз, туку и симбол на љубов, сеќавање и заедништво.
Реконструкцијата на делови од покривот на спортската сала и набавката на нови табли и нивното поставување во подрачниот училишен објект во село Тркање, се направени со средства што се обезбедени преку донации од општествено одговорни компании.
Сликањето мурали на ѕидовите од училишната зграда во Кочани и спортската сала, пак, е заеднички проект со НО „„Odonata Association“ добиен од UNDP.
