Може ли Македонија да ја победи Данска по втор пат? Може ли Кире Лазаров повторно да ја предводи фалангата до нов успех против олимпискиот и светски шампион, како оној пред пет години на неговото селекторски деби. Дилемите ќе ги разрешиме вечерва против Олимпискиот светски шампион Данска.
Најдобриот европски стрелец Кире Лазаров, знае како против фаворитот, знае и како да победува, но и нема преголеми очекување за почетно изненадување на турнирот.
„Го играме првиот натпревар против најдобриот тим во светот во последните 10 години, Данска. Нема потреба да трошиме зборови за нивниот тим и да ги повторуваме истите работи. Многу сме возбудени што ќе играме против нив. Тие се дома, тоа ќе биде многу тешко за нас, но немаме што да изгубиме во овој натпревар и ќе се обидеме да уживаме во него“, изјави Кире Лазаров.
Македонската јавност е свесна за силата на вечерашниот противник.
Ретко кој очекува изненадување, но Кире Лазаров знае како да се победи Светскиот и Олимписки шампион. На дебито како селектор, успеа да ја победи Данска со 33:29, со што најави дека новата репрезентација може да продолжи да ги следи успесите на своите претходници.
Македонија осми пат по ред игра на европските првенства, подвиг кој им успеал на само мал дел репрезентации од европскиот крем. Со континуитетот, Македонија покажува дека има сила да се носи со најдобрите, а второто коло се очекува да биде клучно за остварување на зацртаното, пласман меѓу најдобрите 12 на стариот континент.
Португалија ќе ни биде противник за два дена, натпревар кој ќе треба да се добие ако сакаме да го подобриме пласманот од претходнот Европско првенство, кога завршивме на 17-то место.