Дел од јавните институции и тротоари во Куманово сè уште не се адаптирани за лицата со телесен инвалидитет, а општината во моментов нема доволно финансиски средства за целосна адаптација на постојната инфраструктура, информираше градоначалникот Максим Димитриевски.
-Немаме пристапни рампи во сите јавни институции. Тоа е сериозен финансиски зафат бидејќи има голем број на училишта коишто немаат пристапни рампи- рече Димитриевски.
Според него, во оваа фаза целосно пристапна е само новоизградената инфраструктура, додека постојната ќе се адаптира постепено, во рамки на можностите.
-Со овие расположливи средства сме во можност да градиме пристапни тротоари и рампи само таму каде што се гради нова инфраструктура, што впрочем и го правиме- кажа градоначалникот.
Тој посочи дека дел од училиштата веќе презеле иницијатива и со сопствени средства изградиле пристапни рампи.
-Се обидуваме таму каде што самите училишта имаат средства да изградат рампи, како што е случајот со гимназијата „Гоце Делчев“, техничкото, економското училиште и неколку основни училишта- додаде Димитриевски.
Во однос на постојната инфраструктура, градоначалникот појасни дека интервенциите се сложени и скапи, бидејќи бараат раскопувања на веќе изградените површини.
-За да спуштите еден тротоар на раскрсница, треба да раскопате од осум страни тоа што веќе е изградено. Тоа значи уништување на постојната инфраструктура за да се обезбедат функционални рампи- обајсни Димитриевски
Тој се осврна и на претходни активности за спуштање на тротоарите на дел од улиците, оценувајќи дека тие не дале соодветни резултати. Од општината информираат дека се во комуникација со здруженија на лица со инвалидитет, од кои добиле одредени предлози, но засега нема конкретен план за целосна адаптација.
