Во акција на српската полиција за заплена на пет тони марихуана во селото Коњух кај Крушевац, уапсен е Иван Драгниќ, ко-сопственик на македонска компанија за производство и преработка на медицински канабис, објави српски „Блиц“.
Вишиот суд во Белград му одреди притвор на Драгниќ и уште две лица по заплената на дрогата. Александар Мијаловиќ, означен како организатор, е во бегство и по него е распишана меѓународна потерница. Истражителите наведуваат дека групата дејствувала меѓународно, а дрогата, набавена во јануари во Македонија, била транспортирана преку границата од Драгниќ до магацинот во селото, а потоа понатаму продавана од Урош Младеновски. Вредноста на марихуаната се проценува на околу 50 милиони евра.
Министерот за внатрешни работи Ивица Дачиќ ја оцени акцијата како најголема заплена на дрога во историјата на Србија и додаде дека дрогата најверојатно пристигнала „од јужните соседи“.