Градоначалникот на Општина Дебар, Фисник Меља, кој е во посета Словенија, денеска во Љубљана оствари средба со неговиот словенечки колега Зоран Јанкович.
За време на средбата, двајцата градоначалници разговарале за искуствата и практиките во современото управување со градовите, урбаниот развој и организацијата на комуналните услуги.
Љубљана претставува многу добар пример за одржливо управување со градот, особено во однос на чистотата на градот, урбанистичкото планирање, јавниот превоз и управувањето со јавните простори.
-Во рамки на посетата, градоначалникот Меља, оствари средба и со заменик-градоначалникот на Љубљана, Дејан Црнек, како и со раководителот на секторот за заштита на животната средина, каде се разговараше за политиките и практиките што градот Љубљана ги спроведува во областа на заштитата на животната средина и одржливиот развој, информираа од општината.
Меља изразил посебно задоволство од остварените средби, гостопримството, подготвеноста за соработката и можноста за размена на искуства кои можат да бидат корисни за понатамошниот развој на Општина Дебар.