Интензивните снежни врнежи низ градот Штип не создадоа проблеми во сообраќајот, бидејќи зимската служба на ЈП „Стипион“ е постојано на терен и ги расчистува улиците и тротоарите. Директорот на ЈП „Стипион“, Панче Стефановски вели дека нивен приоритет е да бидат проодни и исчистени влезовите и излезите кон Клиничка болница-Штип, како и влезовите и излезите на градот Штип кон Скопје, Кочани, Радовиш и Струмица.
-Зимската служба на ЈП „Стипион“ од раните утрински часови активно работи на расчистување на улиците. Во прв момент се расчистени улиците со прв приоритет, сите пристапи до Клиничка болница- Штип, сите влезови и булевари во градот, улиците во централното подрачје. Во втор момент се расчистуваат и улиците во сите населби – вели Стефановски.
Навремената интервенција придонесе за проодни улици во целиот град. Како што посочи директорот Стефановски, има доволно сол и абразивен материјал за да се делува во зимски услови. Се дејствуваше со сопствена механизација.
