Наезда од комарци во главниот град. Скопјани деновиве мака мачат да излезат на крај со комарците кои буквално го сардисаа градот. На социјалните мрежи врие од коментари со револт кон градските власти, кои според граѓаните седеле со скрстени раце. А надлежните креваат раменици, се правдаат оти поголемото размножување на комарците било поради „изразената влага во вегетацијата“.
Во меѓувреме, вонредното прскање кое беше најавено за денеска е одложено за утре. Градоначалникот Шилегов даде чудно објаснување, не се прскало често затоа тоа што тоа било штетно за луѓето.
„Препораките на Институтот за јавно здравје е дека прскањето со инсектициди ако е зачестено може да го загрози здравјето на граѓаните што е нешто што треба да се има во предвид. Токму поради тоа сметавме дека треба да имаме пауза од десетина денови, без оглед на тоа што последните три или четири денови се навистина мачни со комарците“, вели градоначалникот на Град Скопје, Петре Шилегов.
Град Скопје годинава прскаше против комарци четири пати. Од понеделникот до петокот минатата недела се вршеше прскање од земја, но комарците се покажаа поиздржливи од хемијата и продолжуваат да ги тероризираат жителите на главниот град.
Градот уште на 8 мај годинава склучил договор со две фирми за прскање против комарци во вкупен износ од еден милион евра.
Биљана Божиновска
