Ќе се заоструваат критериумите за право на здравствено осигурување во Македонија. Фондот за здравство заедно со Управата за јавни приходи и МВР ќе истражува колку „фантомски“ осигуреници има во државата. Во фокусот ќе бидат луѓе кои се осигурани по основ на невработеност, а од ФЗОМ велат дека ризикот од злоупотреби доаѓа од осигурениците кои неформално работат во сива економија и оние кои живеат во странство и приходите им се таму. Ваквите сомнежи ќе се испитуваат во следните неколку месеци по барање на Фондот, кој алармира дека во земјата има помалку жители отколку здравствени осигуреници.
“Ризикот е од две групи. Првата е сива економија каде спаѓаат лица кои остваруваат приходи на неформален начин надвор од трансакциска сметка и во втората група се лица кои не живеат и не ги остваруваат примањата во Македонија. Оваа основа е поврзана со остварени или неостварени приходи на трансакциска сметка. Доколку немате приходи на трансакциска сметка се квалификувате да имате бесплатна здравствена заштита. Поради тоа Фондот трпи штети и по основ на приходи за здравствено осигурување и по основа на повеќе исплатени капитации (број на осигуреници е основ за плаќање на матичните лекари)“, рече Клековски.
Директорот на Фондот, Сашо Клековски не ја исклучува можноста дека има и лажни осигуреници. А малверзации со здравственото осигурување најверојатно има и кај македонски државјани кои живеат во странство, а кои не се одјавиле од земјата и продолжуваат да користат здравствено осигурување, со тоа што во текот на одморите доаѓаат во Македонија и користат здравствени услуги.
Вкупниот број на осигуреници на здравствено осигурување во државата е над еден милион и 840 илјади, што е повеќе од бројот на жители според последниот попис.Од нив, 477 илјади се осигурани по основ на неврботени – бројка што отвара сомнеж за можни злоупотреби.
