По години и години чекање и неизвесност, пациентите со мултипла склероза конечно ќе добијат полесен пристап до неопходните лекови. Терапијата се децентрализира. Наместо само на Клиниката за неврологија во Скопје, лековите отсега ќе бидат достапни и во ГОБ „8 Септември“, Клиничката болница во Штип и болницата „Св.Еразмо“ во Охрид. Пациентите велат дека се задоволни од соработката со институциите. Посочуваат дека терапијата навремено ја добиваат, а дополнителна надеж дава и фактот што буџетот за лекови во последните неколку години е тројно зголемен.
Според директорот на ФЗО децентрализацијата на терапијата за болните од мултипла склероза ќе го намали драстично притисокот на Клиниката за неврологија.
И покрај тоа што пациентите навремено ја добиваат потребната терапија, на Клиниката за неврологија и понатаму недостига најважната алка – магнетната резонанца..Од Клиниката уверуваат дека овој апарат ќе биде набавен во најскоро време.
Невролозите откриваат уште еден тивок страв со кој живеат жените со мултипла склероза, стравот дали некогаш ќе можат да станат мајки.Но медицината денес носи нова надеж. Со современите терапии, велат лекарите, бременоста кај жените со оваа дијганоза е многу побезбедна отколку порано.
Во Македонија со мултипла склероза живеат околу 2.500 луѓе, а секоја година се дијагностицираат приближно 100 нови пациенти.
