По четири дена молк од изнесените тврдења на обвинителката Кадриу, се огласи обвинителот Гаврил Бубевски. Најостро ги демантира, како што вели, клеветите и измислените наводи изнесени од Лејла Кадриу во интервју во емисијата „Вечерното шоу на Богдан Илиевски“ на ТВ Алфа, емитувано на 7 февруари. Тврди дека изнесените наводи имале цел да наштетат на неговиот углед и на личниот и професионалниот живот.
„Доколку не добијам извинување во законски предвидениот рок, ќе поднесам граѓанска тужба за клевета и во суд ќе се докаже дека сè што беше кажано во наведената емисија е апсолутна невистина. Вистината е дека јас никогаш во мојот живот не сум имал четири мобилни телефони. Додека бев јавен обвинител во СЈО имав еден телефонски број што го користев за цело време додека бев во тоа обвинителство. Ги отфрлам сите наводи за какво било влијание и стојам зад секоја одлука која сум ја донел. Во голем дел од ситуациите кои беа претставени, како што е предавањето на прислушуваните материјали во СЈО, јас лично воопшто не сум бил присутен, за што имам и соодветни докази. На страна од тоа, записник за тие материјали постои и тој е дел од доказите во предметот „Таргет-Тврдина““, пишува Бубевски во јавниот демант од изутрината.
Тој го оспорува кредибилитетот на Кадриу, нагласувајќи дека не му биле јасни мотивите за вакви и слични настапи, но немал намера во ниту еден момент да им подлегнува на тие лаги и манипулации.
„Ќе ги искористам сите законски механизми за заштита, како што веќе направив и поднесов тужба и за лагите изнесени од уште еден адвокат – поранешен обвинител кој јавно настапува со истите намери и мотиви. Очекувам во судска постапка да се докаже вистината наспроти лагите со кои „храбрите“ поединци ја манипулираат јавноста подолг временски период, а со тоа да се утврди и нивната кредибилност како извори за информации во медиумите по однос на вистинските состојби во правосудството“, пишува Бубевски во писмото до медиумите.
