По обилните врнежи и излевања на реките, Центарот за управување со кризи вонредно информира дека институциите преземаат на терен координирани мерки за справување со последиците од поплавите во повеќе региони низ Македонија.
По поплавите во скопскиот регион, во општина Сарај, во селата Буковиќ и Семениште, преземени се активности за надминување на состојбата. Интервенираат општинските надлежни служби, но и противпожарните бригади, како и екипи од Водовод и канализација.
Во кумановскиот регион, во општина Липково, реката Слупчанка излезе од своето корито во село Опае, при што е зафатен дел од селото, а најголем дел од поплавените површини се земјоделско земјиште. Излевање е регистрирано и во атарот на село Оризаре, каде се зафатени земјоделски површини.
Во гостиварскиот регион евидентирани се повеќе случаи на поплавувања во општините Гостивар, Врапчиште и Маврово-Ростуше. Во село Беловиште интервенирано е по пријава за заглавени луѓе во поплавен објект, при што тие се безбедно извлечени.
Во село Форино пријавено е излевање на реката Вардар, со поплавени земјоделски површини и потенцијален ризик за куќите во близина на мостот кон село Тумчевиште. Во координација со надлежните институции ангажирана е механизација за отстранување на пречките од речното корито“, информираат од Центарот за управување со кризи.
