Колкови има, операциони сали нема. Пациентите сами избираат кај кој хирург да бидат оперирани, а со тоа и листите на чекање растат. Анализите на ФЗО укажуваат дека најголем притисок има на Клиниката за трауматологија и ортопедски болести и ГОБ „8 Септември“, таму листите се најдолги. Над 650 граѓани чекаат операција за вештачки колк, додека здравствените власти уверуваат дека бројот на интервенции расте и пристапот до операциите се подобрува. Само лани биле извршени повеќе од четири илјади операции на колк и колено. Според Фондот за здравство, дел од листите на чекање не се должат само на недостиг од термини, туку и на фактот што пациентите фаворизираат одредени хирурзи во одредени болници.
“Листите на чекање се такви какви што се, меѓу другото, во „8 Септември“ и на Клинички, затоа што поединци сакаат да се оперираат кај одреден хирург, а не кај некого кај кого можеби има слободен термин” изјави директорот на ФЗОМ Сашо Клековски.
Додека едни чекаат со месеци поради болки и ограничено движење, надлежните најавуваат отворање на нови оперативни сали, подобро снабдување со импланти и централен регистар што треба да стави ред во долгите листи на чекање.
„Овие бројки потврдуваат дека пристапот до операции за замена на колк и колено значително се подобрува. Следува отворање на оперативните блокови на Клиничкиот центар и во ГОБ ‘8 Септември‘, како и понатамошен развој на коленската артропластика“, вели Клековски.
Македонија е чекор напред во регионот кога станува збор за операциите на колк. Според податоците на Фондот , лани биле извршени 198 операции на колк на 100 илјади жители, со што земјава е пред Бугарија, Србија и Романија.Но, додека кај колковите сме меѓу подобрите во регионот, кај операциите на колено се уште заостануваме. Единствено Словенија е пред сите, со околу 210 операции на колк на 100 илјади жители.
Во анализата на ФЗОМ не се вклучени пациенти кои се оперирале од колк и колено во приватните здравствени установи.
