Заврши санацијата на мостот на Маркова Река пред предвидениот рок и од утре, тој ќе биде во целосна функција, информираат од Јавното претпријатие за државни патишта. Средствата за санацијата биле обезбедени од буџетот на ЈПДП, а издвоената вредност изнесувала 4.619.800,00 денари без ДДВ.
-Ги известуваме граѓаните на Кисела Вода, поточно граѓаните коишто гравитираат кон населените места Драчево, Зелениково, Батинци… дека заврши санацијата на мостот на Маркова Река пред предвиднеиот рок и дека од утре, 5 септември мостот ќе биде во целосна функција, се вели во соопштението од ЈПДП.
Во него се додава дека Јавното претпријатие со цел подобрување на безбедноста и функционалноста на конструкцијата на мостот на Маркова Река на регионалниот пат Р1106, започнало со негова санација. Градежните активности, велат, се одвивале, забрзано и со темпо кое е прилагодено на летниот период кога сообраќајот се одвива со намален интензитет, со цел да се минимизира застојот и влијанието врз учесниците во сообраќајот.
-Градежните работи, пак, опфатија санацијата на горниот строј на мостот, при што се изврши отстранување на постојните дилатациони фуги, сливници, асфалтот и тротоарите. Се постави нова бетонска плоча, хидроизолација на мостовската конструкција, се изврши асфалтирање, како и изградба на нови тротоари со рабници и санација на парапетна греда. Градежните работи ги изведуваше Друштвото за градежништво и проектирање „Синтек Инженеринг“ ДООЕЛ, с. Бразда, додека надзорот го вршеше Друштвото за управување со проекти „ЕОС Е.Е.“ ДОО Скопје. Средствата за санацијата беа обезбедени од буџетот на ЈПДП, а издвоената вредност изнесуваше 4.619.800,00 денари без ДДВ, велат од ЈПДП.
Јавното претпријатие за државни патишта, нагласуваат, се грижи за безбедноста и одржувањето на повеќе од 1.100 мостови на државните патишта на целата територија на државата и ја следи нивната состојба со цел зајакнување на безбедноста и сигурноста на учесниците во сообраќајот.
