Сериозни финансиски проблеми, застарен и нефункционален возен парк, спорни вработувања и слабости во управувањето со имотот покажува ревизијата за работењето на јавното претпријатие „Комунална хигиена“ за 2024 година, кога градоначалник беше Данела Арсовска.
Државниот завод за ревизија дал неповолно мислење за финансиските извештаи и за усогласеноста на работењето со законските прописи.
Ревизијата покажала дека околу 60 проценти од специјалните комунални возила не се во функција. Од вкупно 189 возила, исправни биле само 76, додека 80 биле неисправни, а 33 хаварисани.
Просечната старост на возниот парк ја процениле на 15 години, што, според ревизорите, значително ја намалувало способноста на претпријатието за ефикасно извршување на јавната услуга.
Ревизијата покажува дека „Комунална хигиена“ работела со загуба и имала проблеми со ликвидноста. Вкупните обврски се приближиле до 737 милиони денари.
