Премиерот Христијан Мицкоски денеска изјави дека очекува следната недела да има поголемо намалување на цената на дизелот и на бензините откако вчера Регулаторната комисија за енергетика (РКЕ) донесе одлука за зголемување на малопродажните цени на нафтените деривати во просек за 4,55 проценти.
Мицкоски, одговарајќи на новинарско прашање за покапувањето, но и за тоа дали се планира некакво намалување на акзиците или на ДДВ-то, истакна дека акцизите се анализираат на секои две недели, а следната анализа е заклучно со 31 август, кога ќе се направи просекот за тој период.
– Знаете дека на секои две недели се анализираат акцизите. Сега завршува втората половина од месецот и веќе в понеделник ќе направиме просек за тој период. Врз основа на тие параметри, ќе се дејствува врз цената на нафтените деривати. Добро е што веќе два дена по ред цената паѓа. Денеска се стабилизира некаде околу 85-86 долари за барел, така што веќе следната недела очекувам поголемо намалување на цената на дизелот и бензините. Она што е важно е дека ова е берзански производ и сите држави купуваат од ист пазар. Ние како држава имаме убедливо најниска цена на дизелот и на безоловниот бензин во регионот, па и меѓу најниските во Европа – нагласи Мицкоски за време на посетата на општина Илинден.
Според одлуката на РКЕ, од полноќ максималната цена на бензинот „евросупер БС-95“ ќе изнесува 93 денари за литар, а „евросупер БС-98“ ќе се продава за 95 денари за литар. Како причина за корекцијата на цените, од РКЕ посочуваат дека референтните цени на светските пазари бележат раст.
Од РКЕ нагласуваат дека станува збор за максимално утврдени цени и дека трговците на големо и мало може да ги формираат цените на нафтените деривати и на пониско ниво од утврдените највисоки цени.
