Кризата меѓу Соединетите Американски Држави и Иран дополнително ескалира по новите американски напади врз ирански воени цели и инцидентот со нафтен танкер во Ормускиот Теснец. Според американската војска, танкерот бил нападнат откако екипажот не одговорил на повеќекратните предупредувања, додека операциите биле насочени кон воени капацитети за кои Вашингтон тврди дека се користат за загрозување на пловидбата низ теснецот.
Во исто време, иранските медиуми јавија за нови воздушни напади врз Техеран и други делови од земјата, додека Техеран соопшти дека возвратил со напади врз Бахреин и Кувајт. Иранските власти тврдат дека во последните американски напади загинале повеќе од 35 лица, а над 300 се повредени.
Ескалацијата на конфликтот предизвика раст на цените на нафтата, при што суровата нафта „Брент“ надмина 85 долари за барел. Американскиот претседател Доналд Трамп изјави дека Иран наскоро ќе биде поразен и најави можност за проширување на американските операции со цел повторно отворање на Ормускиот Теснец, додека Техеран предупреди дека може да го прекине регионалниот извоз на енергенси доколку продолжи американскиот притисок.
