Правда, култура, односи меѓу заедниците, ова се трите нови Министерства кои ќе ги добие Влен. Од позициите заминуваат Азир Алиу од здравство и Фатмир Лимани од социјална политика, демографија и млади. Албанскиот партнер во власта по реконструкцијата ќе има шест министерски места. Од оние кои претходно ги имаа, ќе им останат животна средина, економија и евроинтеграции. Таму ќе останат истите кадри, бидејќи во партијата се со став дека добро си ја вршеле работата.
-Во пакетот кој што, Влен продолжува со владеењето, односно дел од мнозинството, владиното мнозинство. Тука останува Министерството за животна средина, Министерството за економија, правда, евроинтеграции, култура и Министерството за односи меѓу заедниците, тоа се шест ресорни министерства. Па се уште немаме финално име за Министерството за култура и за правда, тоа се две нови имиња, изјави Сали.
Влен ги презентираше резултатите постигнати во минатите две години владеење. Сметаат дека биле успешни, успеале да исправат многу од погрешните политики и проблеми, кои им биле оставени од дводецениското владеење на ДУИ. Сали вели протестите организирани последниов период, се без основ и се политички монтирани.
-Немаат никаков основ за обвинението кое вие го споменувате, дека ние сме попустливи, па не сме успеале да ги задржиме веќе достигнатите, зацртаните линии во интерес на граѓаните на граѓаните Албанци во државава. Туку напротив сето тоа што они го импровизирале во досегашното владеење, односно во нивниот период на владеење, ти импровизации денес се дел од проблемите со кои се соочуваме ние и ги решаваме еден по еден, изјави Сали.
Инаку во моментов на позициите кои остануваат за Влен од претходно, се Муамет Хоџа во животна средина, Бесар Дурмиши во економија и труд и Беким Сали во европски прашања. Финалното решение за новиот владин кабинет, ќе се знае во вторник, по Извршниот комитет на најголемата партија во владината коалиција ВМРО-ДПМНЕ.
Матеја Петровски
