Се уште се трага по вооружената група која при грабеж на Про кредит банка во центарот на Скопје украде 50 илјади евра, рани двајца полицајци и еден случаен минувач. Едниот полицаец е потешко повреден- во раката и стомакот, но е надвор од животна опасност. Другиот е полесно во ногата. Престрелката се одвивала на крстосницата на крајот од Партизанска кај градски ѕид утрината во 9.30. Од канонадата проектили погодена е една жена која се превезувала во градски автобус, но нема сериозни повреди. Во банката биле повредени уште двајца со удари од автоматските пушки на крадците.  

Вооружената група со автоматски пушки упаднала во експозитурата на Прокредит Банка. Еден од маскираните останал надвор и не пуштал корисници да се приближат до банката додека неколкумина од сефот ги украле 50-те илјади евра. Во тој момент на крстосницата пристигнала сообраќајна патрола со полициски крајслер. Разбојникот што стоел пред банката ги забележал- помислил дека полицијата организира акција за да ги приведе и отворил оган кон нив- бил прецизен - го покосил едниот полицаец. Другиот полицаец возвратил, но на помош на маскираниот му дотрчале разбојниците кои излегле од банката со полна торба пари. Во пукотниците настрадал и другиот полицаец. Нема информации дали е погоден некој од напаѓачите. Нејасно е како вооружените експресно по пукањето успеале со две возила преку мостот Гоце Делчев, Калето да избегаат кон граничниот премин Блаце. Очевидците кои се криеле од куршумите кои летале насекаде не можат да поверуваат дека банда пукала во центарот на градот. Еден од нив бил на само 20 метри од вооружените.

Полицијата уверува дека интервенирала веднаш, но нема објаснување како криминалната група успеала со две возила за 10 до 15 минути да го помине половина Скопје и да избега кон граничниот премин.

Откако пристигнале во скопско Визбегово, на 12 километри од границата со Косово, непознатите крадци паркирале и се прегрупирале. Една девојка за Алфа сведочи дека патот и го попречиле токму крадците- помислила дека се полицајци затоа што носеле заштитни елеци со натпис ПОЛИЦИЈА.

Полицијата ги проверува безбедносните камери од Банката за да го утврди идентитетот на криминалците и да утврди колкумина учествувале во грабежот. Повикала десетици очевидци на испрашување. При престрелката куршуми завршуваа во уличните киосци, автомобили, продавници. За среќа нема повредени иако куршуми поминувале над главите на десетина граѓани.  
 
Љубиша Арсиќ