Конфузија и сплетканост кај Аларова при обидот да го објасни писмото со кое се честат вработените во општина Центар со тридневно бесплатно патување во Сандански, Бугарија. Неколку различни одговори на само едно прашање- со чии пари било планирано да се реализира патувањето? Од негирање дека воопшто постои писмото, преку планирање само на ручек, па интерна анкета и невкусна шега со вработените, до иницијатива за која воопшто и не знаела- вака течеше објаснувањето на Аларова во телефонскиот разговор за Алфа. Заврши со тврдење дека некој го злоупотребил печатот на општината ставен на писмото до вработените за што ќе спроведе истрага, но и со закана со тужба и испитување на интересот на Алфа ТВ за објавата на писмото.
Потписникот на писмото, секретарот Ратко Савовски, преку портпаролката на Општина Центар прати порака дека во понеделник ќе даде објаснување која била намерата на повикот до вработените да се пријават за тридневно бесплатно патување во Сандански Бугарија.
За трошењето на парите од општинската каса Аларова одговара пред советот на општината. Претседателот на советот на општна центар Здравев засега нема информации со кои пари ќе се финансира патувањето- дали парите биле претходно планирани во општинскиот буџет или се пренаменети од други проекти. Ќе го чека крајот на првото тримесечје годинава кога Аларова ќе дава отчет за потрошеното во тој период. Општините, освен од парите на своите граѓани се финансираат и од парите на сите државјани на земјава преку буџетски трансфери како наменски дотации. Дали и наменски се трошени парите, министерството за финансии ќе утврдува откако општината центар на крајот на годината ќе го стави на отчет финансискиот извештај.
Потрагата по парите на граѓаните алфа ја почна вчера откако го објави писмото во кое секретарот на Центар Савовски ги известува сите вработени дека за осми март се организира бесплатно патување во Сандански во Хотел со 4 ри ѕвезди и превоз со луксузни автобуси. Известувањето е пратено на 6-ти фебруари овој месец, а од вработените се бара да се пријават кај техничкот секретар најдоцна до 20-ти Фебруари 2009.
Христијан Стојчевски