Шест недели и еден ден – е рокот кој Европската унија и го даде на Македонија за решавање на прашањето за името. Тоа е условот – за на почетокот на декември на состанокот во Брисел земјава да добие датум за почеток на преговори – одлука која со консензус ја носат земјите-членки. „Времето до 7-ми декември е кусо“ - изјави европскиот амбасадорски двоец Фуере – Фреден на денешната седница на националниот совет за евроинтеграции.
- Шест недели и еден ден преостануваат до Советот на ЕУ на 7-ми декември и тоа е период кој е голема можност која нема да се повтори во долго време, изјави амбасадорот на Шведска во РМ, Ларс Петер Фреден.
Ваквите пораки на амбасадорите следат по изјавите на владини претставници, дадени по добивањето на препораката, дека евроинтеграцијата на Македонија не треба да биде заложник на билатералните спорови. Дипломатите, без вообичаената внимателност, ја потсетија владата да не се дефокусира од главното прашање.
- Нашиот апел до владата е да го искористат овој моментум за вистински и веднаш да ги засилат разговорите со грчката влада во рамките на процесот во ОН, за да може да дојдеме до компромисно решение кое ќе биде во интерес на двете земји и во интерес на евроинтегративниот процес. Ова е кристално јасно и неколкупати го повторивме и се надеваме и очекуваме дека владата ќе го послуша овој совет и ќе се раководи по него, не во шест недели, туку веднаш, изјави Фуере.
Истата порака од Брисел ја прати и еврокомесарот Оли Рен кој денеска во Европскиот центар за политики изјави дека верува дека владата во Скопје ќе ја прифати препораката за преговори на комисијата како многу силно охрабрување за конечно да го реши билатералниот проблем со името. На трибината во влијателниот центар Рен порача дека не поддржува иницијатива за референдум за името, бидејќи смета дека тоа е пандорина кутија за прашања поврзани со евроинтегративниот процес. Позицијата на Груевски и на владата е дека секое решение за името мора да биде ставено на референдум пред граѓаните. Наспроти притисокот од Брисел, Грција продолжува да инсистира на своите „црвени линии“. Алтернативниот министер за надворешни работи Димитрис Друцас денеска изјави дека Атина не се повлекува од позицијата едно име со географска одрденица за севкупна употреба.
Владимир Мирчески