ALFA TV - Македонија - Македонски туристи бараат помош да се вратат од Грција

Македонија

Share |

Македонски туристи бараат помош да се вратат од Грција

четврток, 29 јули 2010, 17:28

Недостигот на бензин во Грција загрози и македонски туристи кои се на одмор кај јужниот сосед. Според македонската комора за туризам, кај агенциите - нивни членки веќе се јавуваат македонски граѓани кои бараат помош за да се вратат дома од одмор. Агенциите се мобилизираат за помош, но велат дека немаат откажување од оние кои се уште не заминале.

Поради ситуацијата во Грција, македонското МНР излезе со препорака:

- „...граѓаните на Р. Македонија кои планираат да патуваат во Р. Грција со патнички возила, да влегуваат во земјата со полн резервоар гориво како и да внимаваат на количеството на гориво неопходно за враќање“.

Од македонскиот конзулат во Солун велат дека наши граѓани секојдневно се интересираат за ситуацијата. Но според генералниот конзул Димитровски - итни повици засега немало.

Според српските и хрватските медиуми низ Грција веќе се продава бензин на црно по цена од 5 евра за литар. Премиерот Папандреу им се закани на превозниците со затвор доколку до полноќ не го прекинат штрајкот и не почнат да превезуваат бензин. Превозниците одговорија со обид за насилен влез во министерството за транпсорт- што заврши со ќотеќ и солзавец од полицијата.

Уште вчера камерата на АЛФА забележа грчки државјани кои влегуваат во Македонија само за да наполнат бензин. Ако ситуацијата во Грција не се реши во следните неколку дена извесно е нивниот број да се зголеми.

Александар Димитриевски